Assam sorkar chungah SC lawm lo CS laka hremna lekkawhah vau

Assam sorkar in dan loa ramchhunga awm ramdang mi thawnchhuah leh chhuah zalen chungchanga Supreme Court zawhna a chhan dan chuan SC a ti lawm lo hle a, Court chuan state Chief Secretary lakah contempt notice a pechhuak dawn niin an sawi.

Supreme Court hian April 9 khan Assam Chief Secretary Alok Kumar chu ramdang mi detention centre-a awm mek, hun rei tak awm tawhte chhuah an nih dan tur chungchangah kawng dap tur leh state leh sorkar laipuia mawhphurtute pawh be rawn turin an ti a ni.

Chief Justice Ranjan Gogoi bakah Justice Deepak Gupta leh Sanjiv Khanna-te awmna bench chuan affidavit thehluhte uluk taka an thlithlai hnuah, Assam-a tribunal in mi nuai khat vel ramdang mi a a puan chungchang leh mi pali chauh thawnchhuah an nih thu te, detention centre-a mi 900 an awm chungchang te chu an ngai thutak hle a ni. Bench chuan state sorkar chu ramdang mi ramchhunga rawn pem lutte man kawngah a hlawhchham niin a sawi.

Ramdang mi tam tak awm chuan tualchhung mite an pawlh nasa hle tih sawi bawkin, Lok Sabha inthlanah pawh vote an thlak ve hial mai thei niin an sawi bawk. "Detention centre-ah mi 900 in dah a, hetiang hi in sorkar kal dan reng a ni", tiin an chhuahchhal hial.

Bench chuan Chief Secretary pawh a office luah zui reng tura dikna chanvo nei tawh lo a nih thu sawiin dan leh ram danpui hmaah belchian dawl lo thuchhuah a siam avangin contempt notice an pe dawn tih an sawi bawk.

State sorkar leh sorkar la­ipuiin meeting an neih leh neih loh an zawhna chhangin CS chuan an neih ngei thu a sawi a, mawhphurtu lian pahnih meeting minute chu an dil bawk a, mahse CS chuan a kawl loh thua a chhan avangin SC chu an lawm lo hle a ni.

Assam sorkar aiawha inlan Solicitor General Tushar Mehta chuan Alok Kumar chu theihtawpa hum a tum nia tarlan a ni bawk. Mahse Court lam hi affidavit-a CS in hming a sign dan chungchangah pawh an lawm lo hle a, Tushar Mehta hian ngaihdam a dil hial a ni.