Manipur: Polling station 12-a inthlan ṭhatah vote 87.12% tla

Inner Manipur par­liamentary con­stituency-a Nilaini-a polling station 12-a inthlan ṭhatna neihah vote 87.12% a tla tih Joint Chief Electoral Officer (CEO) chuan a sawi.

Inner Manipur consti­tuency-ah hian April 18 khan Lok Sabha inthlan thawh hnihna neih a ni a, vote thlak ṭhatna station-ah te hian vote inthlak sak leh thil dik lo eng eng emaw a thleng nia report a awm avangin Communist Party of India candidate Dr M. Nara leh Indian National Congress candidate O. Nabakishore-te chuan inthlan ṭhatna neih hi an ngiat a ni.

Joint Chief Elec­toral Officer (CEO), Nongmei­kapam Ramananda chuan boruak muanawm tak hnuaiah inthlanna neih a nih thu a sawi. Inthlan ṭhatna neihna zingah hian Chief Mi­nister N. Biren Singh-a bial, Heingang Assembly segment-a polling station pawh a tel a ni.

Station pahnihah buaina chhuakJoint CEO in boruak muanawm tak hnuaiah inthlanna an nei tih sawi mah se polling station pahnih bulah BJP worker nia hriat ten CPI worker-te an bei a, lirthei pahnih tihchhiat a ni bawk.

Buaina chhuahna hi Andro Assembly segment leh Keirao Assembly seg­ment-a polling station-ah te a ni a, CPI worker ṭhen­khatin hliam an tuar nia tar­lan niin, ngaihtuahawm erawh an ni lo tih an tarlang thung.