Sri Lanka-a bomb puak vangin Kristian tamna state Nagaland fimkhur

Easter Sunday-a Sri Lanka biak-in pathum leh hotel

ṭhenkhat bomb a nih hnu khan Nagaland sorkar chu a fimkhur hle a, Sri Lanka anga chhiatna an tawh ve lohna turin hma an la a ni.

Nagaland chief secretary Temjen Toy chuan Director General of Police (DGP) hnenah thupek tichhuakin an state in beih an tawh lohna tura venhimna an kalpui dan te ennawn turin a ti.

Temjen Toy chuan DGP, Inspector General of Assam Rifles (North) leh Joint Director, SIB-te hnenah lehkha thawnin April 21-a Sri Lanka-a bomb puak ang chu an tawn ve theih avangin uluk taka venhimna kalpui turin a hriattir a, DGP chu venhimna kalpuina kawnga state inbuatsaih dan ennawn turin a ti bawk.

Sri Lanka bomb puakah hian mi 250 chuang zet an thih bakah mi 400 chuangin hliam an tuar a, hetiang thil hi Kristian state Nagaland chuan an tawn ve lohna turin an fimkhur hle a ni.

Nagaland-ah hian 2011 chhiarpuiah khan mi 19,80,602 an awm a, heng zinga 88% hi Kristian a ni. 2011 chhiarpuia a lan dan hian Kristian 17,39,651 awmin, Meghalaya leh Mizoram nen ramchhunga Kristian tamna ber state an ni a, an state chhung khawpui lian hrang hrangah pawh biak-in lian tak tak an nei bawk.

Nagaland hi khawvel huap pawha Baptist kohhran tamna state an ni a, Kristian zinga 75% vel hi chu Baptist kohhran an ni. Nagaland-ah hian kum zabi 19-na ṭantirh aṭang khan Kristianna hi a lut ṭan a ni.

State chhunga Hindu awm zat chu 8.75% niin, Islam 2.47% leh Jainism 0.13% an awm bawk.