Tripura CM-in Covid-19 a kai

Tripura chief minister Biplab Kumar Deb chuan Covid-19 hri a kai tih nimin khan a sawi.

CM Deb chuan a twitter-ah Covid-19 a kai thu hi sawiin, doctor-te thurawn angin in lamah a inkhung hrang nghal tih a sawi. Mipuite hnenah hri leng laka inveng ṭha a, sorkarin kaihhruaina a siamte zawm ṭha turin a sawm nghal bawk.

Tripura sorkar hian hri leng thawh hnihna thleng mek avangin tun hnai maiah inkaihhruaina khauh zawk a lo siam thar tawh a ni. He kaihhruaina siam tharah hian sorkar office tinah face mask vuah vek tura tih an ni a, a vuah lo mante chu a ṭum khatnaah Rs 200 chawi tirin, man nawn an nih chuan Rs 400 zel chawi tir an ni ang. Office leh public transport-ah social distancing chu khauh taka kengkawh tura tih a ni bawk.

Dr Sangeeta Chakraborty chuan CM hian symptom a neih avangin Nilaini khan a sample lak a ni a, hri a kai tih hriat a nih thu a sawi. Thawhlehnia Tripura Tribal Areas Autonomous District Council (TTAADC) inthlan neih takah khan, inthlan dawnin CM hi campaign-in mipui zingah pawh a awm nasa viau a ni.

Assam-ah Covid-19 kai 70 awm thar
Assam-ah Thawhlehni khan Covid-19 hri kai mi 70 an awm thar a, kumina ni khatah hri kai thar an tam ber ni a ni.

Thla thum chhung chu ni khatah hri kai thar hi 30 hnuai lam an ni chho tawh a, mahse March thla tawp lam aṭang khan hri kai hi an pung chho leh ṭan a ni. State puma hri kai hmuh chhuah tawh hi 2,18,740 an tling tawh a, an zinga 1,347 chuan an thihpui tawh bawk. Hri kai enkawl mek hi 627 an awm.