Assam election : Voter 90 awmna polling booth-ah vote 181 a tla

Assam assembly inthlan chu zawhfel a ni ta. Inthlan hi thawh thuma neih a ni a, March 27, April 1 leh April 6-ah vote thlak a ni a, May 2-ah vote tlate chhiarin result puan a ni ang.

Inthlan thawh hnihna, April 1-ah neihah khan Dima Haso district-a Haflong constituency-a polling booth pakhatah chuan voter register 90 an awm laiin vote 181 a tla.

Election Commission chuan thil dik lo awm hi a hriat hnuah polling official parukte a suspend nghal a, he booth-ah hian vote thlak ṭhat tir leh a tum nia sawi a ni a, thuchhuah erawh a la siam lo. EC chuan president leh 1st polling officer-te thu zawhfiah an nih hnuah, he polling station-a registered voter ni lo te chu vote thlak an phalsak tih an sawi niin a tarlang. Hei vang hian an duty thlahthlamah puhin suspend nghal an ni tih a sawi bawk.

Ratabari bialah pawh vote thlak ṭha turin EC chuan a lo ti tawh bawk. He biala vote thlakna, electronic voting machine (EVM) pakhat chu vote thlak zawh hnuah BJP candidate car-a phurin strong room panpui a ni a, hei hian sawisel a hlawh hle a, Karimjangj-ah buaina pawh a chhuah phah hial. EC chuan he thil thleng vang hian official pali a lo suspend tawh a, hemi rual hian EVM-a seat te chu engmah tihchhiat a awm lo tih a sawi thung.