Manipur : Zirlai pawlten hill district-ah nawrh huaihawt
Manipur police-ten All Tribal Students’ Union, Manipur (ATSUM) hruaitu pathum an man avanga lungawi loin, zirlai pawlte chuan Thawhlehni khan hill district-ah nawrh an huaihawt.
Hill district hrang hrangah ATSUM bakah, Kuki Students' Organisation (KSO) leh All Naga Students’ Association, Manipur (ANSAM) chuan lungawi lohna lantirin 'emergency shutdown' an puang a ni.
Zirlai pawlte chuan ATSUM hruaitu pathum - Shimthar Jajo, Khaiminlen Doungel leh Kakai Singsitt-te chu chhuah nghal tura an phut thu an sawi. Heng hruaitu pathumte hi Thawhṭanni zan khan police-te chuan an in ṭheuh aṭangin an man a ni.
Hill district-a Autonomous District Councils (ADCs) inthlan neih tur state sorkarin a tihkhawtlai zel avanga ATSUM-in lungawi lohna an lantir kaihhnawihah an pawl hruaitute hi man an ni. Thawhṭanni aṭang khan ATSUM hian inthlan buatsaih thuai tura phutin hill district-a sorkar office-te chu an dang a ni.
State sorkar chuan department hrang hrangte nena an sawiho hnuah, ADC inthlan hi June 25, 2021 hmaa buatsaih a tum thu a sawi. Hetih lai hian ATSUM chuan sorkar aiawhte nena inbiakna an neihah inthlan buatsaih hun tur chungchangah inremna an siam lo ti sawiin, hei vang hian nawrh an huaihawt pawh an chhunzawm zel dawn tih an sawi.