Manipur-a Catholic School upa ber dawttu hal

Manipur-a Catholic School upa ber dawttu, Chandel district-a Sugnu area a awm, St Joseph School chu Ningani zan dar 9.50 velah khan misual in an hal.

Classroom block leh principal office-te chu a kang chhe hman vek a, bungrua cheng nuai 35 man hu vel chu a kangchhe hman nia report niin, police-te chuan Zirtawpni khan rinhlelh mi pahnih an man tawh bawk.

An mi man te hi Kuki Students’ Organisation (KSO) Gunpi block executive member ve ve an nih thu tarlan a ni. Inspector General of Police (IGP), K Jayenta Singh chuan midang pawh an la zawng mek tih sawiin rinhlelh dang pawh an la nei tih a sawi. KSO member pahnih an man te pawh chu an inhnamhnawih ngei em tih an la finfiah lo tih a sawi a ni.

St. Joseph School hian zirlai paruk an suspend-na an sut duh loh avangin KSO Gunpi block hian tiam chin awm loa school khar sakah hian an lo vau tawh a, rinhlelh thila an man zinga mi pakhat zawk David Jamminlen Baite-an school kharsak an nih thu notice a tihchhuah chu social media lamah a darh bawk.

Catholic Educational So­ciety Manipur (CESM) chuan school hal a ni chu an dem thu sawiin CESM director chuan zirna temple hal a ni chu na an tih thu a sawi.