Tripura CM nupui chungchanga post share vangin police suspend Freelance Journalist Talapatra man bawk

Tripura Chief Minister Biplab Kumar Deb nupui Niti Deb-in a pasal lakah inṭhenna, 'divorce suit' a file nia social media-a thu post share tu police constable chu man niin Pathianni aṭang khan suspend a ni.

Police officer chuan constable Jamal Hossain chu social media a thu dik lo a post a share avangin man a nih thu leh a hnuah a service aṭanga suspend a nih thu a sawi. Hossain hi Communist Party of India-Marxist (CPI-M) legislator Islam Uddin bodyguard a nih thu tarlan a ni bawk.

Tripura police-te chuan Zirtawpni khan CM nupui Niti Deb-in CM lakah 'divorce suit' a file nia social media-a thu post tu Anupam Paul lakah FIR an ziaklut a, Deputy Inspector General (DIG) Arindam Nath chuan Paul hi zawn mek a nih thu leh an chhuizui mek thu a sawi.

Anupam Paul hi Bharatiya Janata Party (BJP) social media wing-a thawk ṭhin a ni a, a hma pawhin social media-a thu dik loh thehdarhah puh a ni tawh bawk.

Chief Minister Kumar Deb pawhin thu dik lo vawrhdarh tute chu tumah zuah an ni dawn lo tih a sawi. CM nupui Niti Deb pawhin social media-a thu post a hriat chuan a ṭhawng hle tih a sawi ve bawk a ni.

Tripura police-te chuan hemi kaihhnawihah hian freelance journalist Saikat Talapatra chu Pathianni khan an man a, Assistant police inspector general Subrata Chakraborty chuan thu dik lo vawrh darhnaah hian Talapatra hi a inhnamhnawih niin a sawi. Heihi Paul-a laka thubuai ziahluh aṭanga hriat a nih thu a sawi bawk.