NSCN-IM in ISIS laka Nagaland venhim tiam

Nagaland hel pawl National Socialist Council of Nagaland (NSCN-IM) chuan Nagaland chu Islamic State (IS) beihna laka venhim an tiam tih an sawi.

Nagaland hi Kristian state a ni a, Easter Sunday-a Sri Lanka-a biak-in beih a nih hnu khan an fimkhur hle a ni. NSCN-IM steering committee executive member V Horam chuan an sipaite chu ISIS hneh turin an inpeih reng tih sawiin an intelligence wing-te chu an active hle tih a sawi bawk.

Pawnlam miin an ralmuanna tihchhiat an tum a nih phawt chuan an ngawi mai mai dawn lo tih sawiin an hneh zel dawn tih a sawi. Naga Army-te pawh an inring reng tih a sawi a ni.

Nagaland sorkar pawh a fimkhur hle a, April 22 khan Nagaland chief secretary Temjen Toy chuan Director General of Police chu venhimna kawnga an inpeih dan enfiah turin a ti tawh bawk a, DGP bakah hian In­spector General of Assam Rifles (North) leh Joint Director, SIB-te hnenah pawh venhimna kalpui uluk turin a lo ti tawh bawk.