AP-ah Sri Lanka chhiatna tuarte zahna lantir

Arunachal Pradesh Catholic community-te chuan Pathianni khan Easter Sunday-a firfiak te bomb tihpuah avanga Sri Lanka-a chhiatna tawkte zahna urhsun takin an lantir.

Indian Catholic Church chuan Easter Sunday dawt chiah Pathianni-ah Divine Mercy Sunday an hmang ṭhin a, hemi ni hian urhsun taka ṭawngṭaina hun an hmang ṭhin a ni. Hemi ni pual hian Arunachal Pradesh Catholic-te chuan Pathianni inkhawmah khan Sri Lanka chhiatna tuarte tan urhsun taka ṭawngṭaina bik tak neiin tlai lamah Eucharistic Adoration leh candle light rally-te an nei bawk.

Miao Diocese Bishop, Bishop George Pallipparambil chuan Easter Sunday-a Sri Lanka-a bomb puak vanga chhiatna tawk leh nunna chan te a tawrhpui thu sawiin, na a tih thu leh a dem thu a sawi. Sri Lanka ram chuan tharum thawhna an tawk nasa tawk tawh tih sawiin Sri Lanka mipuite an tawrhpui takzet thu a sawi.

Sri Lanka mipuite chu an ṭawngṭaipui thu sawiin thihna pawh hnehtu Pathian chuan beiseina leh muannna nen Sri Lanka mipuite chu awmpui se a duh thu a sawi a ni.

Miao Catholic ṭhalaite chuan Changlang district-a Namphai-a bazar hmunah rally an buatsaih bawk a, Miao ṭhalai hruaitu Nangtim chuan Sri Lanka chanchin chuan a ti na hle tih sawiin lawmna ni turah an unaute an sun ta zawk tih a sawi.

Grotto of Sacred Heart aṭanga Government Higher Secondary School thleng kawngzawh in mi 200 vel an tel a ni. Rally hi Muslim community leh Hindu te pawhin an ṭawiawm nia tarlan a ni a, Lohit district-a Tezu-ah leh Longding district-a Pongchao-ah te pawh rally hi neih a ni bawk.