Lockdown leh zan curfew puan tumna awm lo - Himanta

Assam health minister Himanta Biswa Sarma chuan nimina Guwahati-a state BJP head office-a press conference a neihah, Covid-19 hri leng vangin an state-ah lockdown emaw, zan lam curfew emaw puan tumna a awm lo tih a sawi.

Rongali Bihu festival pawh lawm a ni dawn tih Minister chuan a sawi a, mahse festival lawm dan tur chungchangah sorkar chuan inkaihhruaina a siam thuai dawn a ni, a ti.

Minister chuan Assam-a Covid-19 hri kai an pun chhoh leh chungchangah, nikum March thla khan hri kai hi nasa takin an pung chho a, khatiang hun velah khan ram chhung state dangte ang bawkin hri kai hi an pung chho ve leh a ni, a ti. Hemi rual hian lockdown leh zan curfew puan tumna a awm lo tih sawiin, mipuite chu symptom an nei a nih chuan in test vat turin a ti.

Sarma chuan test neihsak zat hi an pung chho hle tih sawiin, ni khatah mi 35,000 vel zet test neih ang ani a, kar leh lamah chuan ni khatah mi nuai khat zet Covid-19 test neih sak hi an tum tih a sawi. Test neih tam rualin positive case pawh an pung ve zel a, mahse mipuite tan chiai phahna tur a awm lo a, sorkar chu a inbuatsaih ṭha hle tih a sawi.

Nilaini khan Assam-ah hian Covid-19 hri kai thar hi mi 195 an awm a, heng zinga 104 chu Kamrup (Metro) district-a mi an ni.

Manipur-in border-ah Covid-19 test kalpui leh dawn
Ram chhung state eng emaw zatah hri kai nasa taka an pun chhoh leh avangin Manipur sorkar pawhin hri leng laka invenna tur khuahkhirhna te a siam ṭha leh a, state pawn aṭanga lutte chu border-ah Covid-19 test neih sak zel an ni leh dawn.

State sorkar chuan Senapati district-a Mao Gate leh Jiribam district-ah testing facility a dah leh dawn tih sawiin, an state-a hri darh tur venna theihtawp chhuah leh a ngai tih a sawi.

Chief minister N Biren Singh chuan hemi chungchang hi a Facebook page-ah ziakin, mipuite chu hri laka invenna tura kaihhruaina siamte zawm ṭha a, social distancing zawm tur leh leh face mask vuah ṭha turin a ngen.

Sorkar thuchhuah chuan, Imphal airport-ah RT-PCR testing facility-ah state dang aṭanga lutte chu test zel an nih thu leh, test man Rs 500 a nih thu a sawi. Airport arriving hall-a mipui inhnawh khawm tur venna atan parking area-ah testing shed siam a ni ang.

Pawn chhuahnaah face mask vuah lote chu man a, pawisa chawi tir an ni zel dawn tih home department chuan a sawi a, face mask vuah lote hian Rs 200 zel an chawi dawn a ni.