Manipur ADC inthlan hun May 5-ah puang dawn

Manipur sorkar chuan Autonomous District Councils (ADCs) inthlan neih hun tur chu May 5-ah a puang dawn.

Nilaini zan khan state sorkar aiawh leh ADC inthlan buatsaih phuta nawrh huaihawt mek, All Tribal Students' Union Manipur (ATSUM) aiawhte chuan meeting neiin, inthlan neih hun tur hi an rel a ni. Meeting-ah hian sorkar aiawhin water resource and YAS minister Letpao Haokip, PHED minister L Dikho leh tribal affairs and hills minister Vungzagin Valte te an tel.

Sorkar leh ATSUM aiawhten inremna an siamah, ADC inthlan hi kumin June 25 hma ngeia zawhfel vek an rel a, inthlan neih hun tur ruat chungchanga sorkar pawh mawhphurhna la a, rang taka ngaihtuah turin an ti a ni.

ATSUM hian ADC inthlan buatsaih phutin state chhungah hill district-ahte nawrh an lo huaihawt tawh a, nawrh huaihawt vanga an pawl hruaitu pathum man an nih hnuah Thawhlehni khan total shutdown an lo puang tawh bawk.