Meghalaya : Hel inpe ten chhawmdawlna pek phut

Garo National Liberation Army (GNLA) helpawl ṭhina member, sorkar kuta inpe tawhte chuan Nilaini khan Meghalaya sorkar hnenah kum nga liamtaa an inpek ṭuma hamṭhatna pek a lo tiam tawhte chu tipuitling turin an phut.

GNLA member hluite hian East Garo Hills district-a Chisobibra khuaah meeting neiin, sorkarin hel inpete chhawmdawlna tur economic package pek a lo tiamte chu pechhuak tawh tura an phut thu an sawi a ni.

Kum 2009-a din, GNLA hian Meghalaya khawthlanga lama 'Garoland' din tumin an bei a, member 200 chuang an awm. Mahse kum 2016 khan sorkarin an helna bansan a, sorkar kuta an inpek chuan an intunnun chhohna tur sum lama chhawmdawlna pek a tiam hnuah an inpe a ni. Mahse sorkar hian chhawmdawlna pek a lo tiam hi tun thlengin a la pe chhuak lo niin an tarlang.

Ministry of home affairs-in thuchhuah a siamah chuan hmarchhak biala hel inpete hi bank-ah kum thum chhung atan fix deposit-in Rs nuai 4 zel dah sak an ni ang a, hei bakah hian kum thum chu thla tin stipend Rs 6,000 pek an ni bawk ang. Mahse sorkarin chhawmdawlna pek a tiam hi an pawl member tumahin an dawng lo niin GNLA hruaitute chuan an sawi. Hei bakah hian silai leh silai mu an pekluh aṭanga incentive pek a tiam pawh an dawng lo tih an sawi bawk.