Meghalaya lungalhthei khur Ruang pakhat lachhuak leh

Indian Navy leh National Disaster Response Force (NDRF) ṭangkawpte chuan Nilaini khan Meghalaya lung­alhthei khur aṭangin ruang pakhat an lakchhuah leh.

Nilaini-a ruang lakchhuah hi ruang an lakchhuah pahnihna chiah a la ni a, ruang an hmuh tawh zat erawh pali a ni thung.

Ruang an lakchhuahna hi khur chhung ft. 370 aṭangin a ni a, a chhe tawh hle tih sawiin chhan­chhuah hna thawktu zinga mi chuan underwater remotely operated vehicle (UROV) hmang­in an hnukchhuak tih a sawi a, chawhnu lam dar1.20 velah khan an lachhuak tih a sawi a ni.

Kum liamta December 8 khan Jaintia Hills-a Ksan thingtlang khuaa lungalhthei khurah hian mi 15 an tang a, khur chhungah hian tui tam tak a luh avangin chhanchhuah hna thawh hi a harsa hle a, ni 77 zet a ral hnuah ruang pahnihna hi an lachhuak thei chauh a ni. January 23 khan ruang pakhat chu an lachhuak tawh bawk.

Ruang hi Meghalaya police kutah dah a ni a, Khliehriat hospital-ah autopsy tih turin an kalpui nghal a ni.

Lungalhthei khura chhan­chhuah hna thawh hi Supreme Court chuan a vil reng a, an ruang hi lachhuak ngei turin thupek pawh a lo tichhuak tawh bawk.

Meghalaya-ah hian lungalh­thei khur tam tak awm mah se National Green Tribunal chuan April 17, 2014 aṭang khan lungalhthei khur laih, a bikin rat hole mining hi a khap a, mahse a ruka kalpui reng a ni tho a ni.

Chhanchhuah hna thawk tur hian Indian Navy-te leh NDRF-te hian an awmchilh tawp a, khur chhung aṭang hian tui an pump chhuak reng bawk a ni.