Meghalaya ADC inthlan KHADC-ah 62%; JHADC-ah 78% vote tla

Meghalaya-a Autonomous District Council pahnih, Khasi Hills leh Jaintia Hills Autonomous District Council inthlan chu Thawhlehni khan tluang taka zawh a ni a, buaina chhuak report a awm lo nia tarlan a ni.

Commissioner and Secretary in charge of District Council Affairs department, Tining Dkhar chuan tlai dar 6 thleng khan KHADC-ah chuan vote 62% a tlak thu sawiin, JHADC-ah chuan 78.65% a tla thung tih a sawi.

Tining Dkhar chuan Ningani zanah vote tla zat diktak chu hriat a ni thei dawn chiah tih sawiin, Nilaini thleng kha chuan polling station report an la dawng kim lo tih a sawi a, vote tla zat chu a la pung leh dawn tih a sawi bawk. Dkhar chuan district council pahniha constituency 58-ah inthlan hi tluang taka zawh a nih thu a sawi a, EVM chiang lo pawh 0.07% chiah a awm tih a sawi a ni.

KHADC-a EVM pakhatah buaina an tawk tih sawiin JHAC-ah chuan EVM paruk-ah buaina a awm tih a sawi a, mahse EVM zawng zawngte hi a hun takah thlak leh hman vek an nih thu a sawi bawk.

District Council Affairs (DCA) department chuan ADC inthlan atan hian EVM 820 an lei thar a, neihsa 1925 an nei bawk a ni. Khasi Hills-ah hian vote thlak thei mi 8,29,774 an awm nia report a awm laiin, Jaintia Hills-ah chuan 2,51,514 an awm thung.

Council pahnihah hian MDC member 30 ve ve an awm thei a, seat 29 ve veah inthlanna hi neih niin, seat khat la bang te hi chu nominate tur an ni thung, KHADC-ah hian candidate 130 awmin JHADC-ah hian candidate 101 an awm a ni. Jaintia Hills-ah hian CEM hlui Moonlight Pariat leh JHADC CEM Lamdibok Sumar-te an ding a, anni pahnih hi UDP hmingin an ding. Congress ticket-a ding CEM hlui tho Andrew Shullai pawh a langsar viau bawk.

Khasi Hills lamah hian UDP candidate leh MLA hlui ni bawk Paul Lyngdoh, NPP candidate leh sitting MLA, Gigur Myr­thong leh Independent candidate, Lambor Malngiang-te chu an langsar ve thung a ni.

Congress, National People’s Party, United Democratic Party, Hill State Peo­ple’s Democratic Party, People’s Demo­cratic Front leh Khun Hynniewtrep Natio­nal Awakening Movement (KHNAM)-ten candidate an neih bakah Independent candidate 19 an awm bawk.

KHADC-ah hian polling station 1,433 awmin JHADC-ah hian polling station 408 a awm thung. Kumin inthlan aṭang hian NOTA an hmang ṭan dawn a ni. Naktukah vote tlate hi chhiar a ni ang.