Assam : Buhfai man tlawma leina tur scheme tlangzarh
Assam sorkar chuan Ningani khan an state chhunga chhungkaw nuai 55 chuangte hnena buhfai kg khat Re.1-a leina tur, Afforadable Nutrition and Nourishmen Assistance (ANNA) scheme a tlangzarh.
CM Sarbananda Sonowal chuan ANNA scheme hi hawngin, he scheme hian chhungkaw rethei leh harsa zawkte rilru hnual leh hrehawm ti loa an nun theihna tura siam a tum a ni, a ti. Prime Minister Narendra Modi chuan mitinten hma an sawn theihna tura ang khata thuam chak an nih chu thupuiah a nei a, he scheme pawh hi hmasawnna kairual taka neihna tura ni, a ti.
Sorkar laipui leh state sorkar chuan mitinte hmasawnna ang khat an neih theihna turin theihtawp an chhuah a ni tih sawiin, CM chuan welfare scheme te hi a nihna anga taka kalpui a nih theihna tura sorkar thawhpui turin mipuite a sawm nghal bawk.
Khawtlanga thil ṭha lo awmte umbo an nih theihna turin hmeichhiate pawh khawtlang thilah inhmang turin Sonowal chuan a chah a, an state-in khua leh tui ṭha tak te siamchhuah theihna turin nu te chu an fate-ah zirtirna ṭha tuh turin a chah bawk a ni.
Health Minister Himanta Biswas pawhin thu sawiin, ANNA Yogna hnuaiah state chhunga chhungkaw nuai 55 chuangte chuan buhfai kg 1 Re.1-in an lei thei dawn tih a sawi. Re.1 aia toa leitir tum an awm a nih chuan helpline an siamah complain nghal vat turin a ti bawk.