Assam sorkarin hel inpe puala scheme siam tlangzarh

Assam sorkar chuan hel inpete tana eizawnna thar an dap theihna tura an puala scheme a siam, 'Swabalamban' scheme chu Ningani khan a tlangzarh.

Assam Chief Minister Sarbananda Sonowal chuan scheme hawnnaah hian ‘Swabalamban’ scheme hmanga hel inpe te hnenah nationlized bank-te'n loan an pekna tur, sanction letter chu leh sorkarin ngaihnathiamna a pek te chu a sem nghal a ni.

State sorkar hnuaia Home and Political Depart­ment-in a siam scheme hi hel inpe 508 te chuan sorkarin eizawnna thar an dap theihna tura sum lama puihna hi an dawng dawn a ni.

Sonowal chuan hel inpete chu an tha leh zung te a ṭha zawnga hmang tura fuhin, state hmasawnna atana thawhhlawk tak ni turin a chah. CM chuan helna bansan a, kawngdik zawhtu ṭhalaite chuan an state-in hma a sawnna turin tih theih tam tak an nei a ni tih a sawi a, hemi kawnga state sorkarin a puihna chu an tha tichaktu atana hmang turin a chah a ni.

CM chuan hel inpete chu midangte entawn tlaka awm tura ngenin, hna ṭangkai tak thawk a, ṭhalaite a ṭha lam hawia chawk phurtu ni turin a chah. ‘Swabalamban’ scheme chuan khua leh tui ṭha tak an nih theihna tur kawng remchang tak a hawnsak a ni, a ti.