Hmarchhak biala Covid-19 dona atan Rs vbc 250 sanction a ni tawh : DoNER Minister

Ministry of Development for North Eastern Region (DoNER) minister Jitendra Singh chuan hmarchhak state pariata Covid-19 hri leng dona kawnga chak zawka hma lak a, healthcare facility siam belhna turin cheng vaibelchhe 250 chuang sanction a ni tawh tih Ningani khan a sawi.

New Delhi-a Parliament Consultative Committee for DoNER meeting neihah, minister chuan fund hian Covid-19 hri leh hri leng dang dona kawnga infrastructure dinna kawngah a pui hle a ni, a ti. Meeting hi virtual-a neih niin, hmarchhak state MP-te bakah DoNER, tourism ministry leh North Eastern Council secretary-te an tel a ni.

Nikum March thlaa hripui leng vanga ram puma lockdown puan a nih hma khan hmarchhak state-te tan hian DoNER ministry chuan cheng vaibelchhe 25 a lo pe chhuak tawh a ni.

Meeting-ah hian North East Special Infrastructure Development Scheme (NESIDS) leh hmarchhak tana special package siamte bakah hmasawnna tura hmalakna hrang hrangte an thlir ho bawk.