Gauhati HC in NDFB hruaitu Daimary bail dilna hnawl

Gauhati High Court chuan kum 2008, October 30-a Assam-a ṭum eng emaw zat bomb tihpuahnaa inhnamhnawih, National Democratic Front of Bodoland (NDFB) hruaitu Ranjan Daimary leh mi dang palite bail dilna chu a hnawlsak.

NDFB hruaitu Daimary leh mi 100 chuangin an thih phahna, Guwahati, Kokrajhar, Bongaigaon, leh Barpeta Road-a bomb tihpuahnaah hian a mawhphurtu bera puh a ni. Bomb puak vang hian mi 400 chuangin hliam an tuar bawk.

Nikum January 30 khan Ranjan Daimary hi bomb tihpuah chungchangah dam chhung tang tura hrem a ni. Kumin January 24 khan New Delhi-a Bodo Accord chungchanga Peace Talk neih meka tel turin thla khat chhung atan Gauhati Central Jail aṭangin interim bail-a chhuah a ni.