Assam minister-in a thu a thlak Hri leng laka fimkhur turin mipuite a chah

Assam health minister Himanta Biswa Sarma chuan Assam-ah coronavirus a bo tawh a, face mask vuah a ṭul tawh lo tih a sawi hnu lawkah, Ningnai khan a thu thlakin Covid-19 hri kai an pun chhoh zel avangin state mipuite chu fimkhur turin a chah.

Minister-in an state-ah hri a awm tawh lo niin sawi mah se, January-February thla chhung khan chawh rualin nitin hri kai thar 13 zel awm ang an ni a, April thlaah hri kai hi an pung chho chak leh hle a, nikhatah hri kai thar 83 zel awm ang an ni tawh a ni.

Ningani khan state pumah hri kai thar 245 an awm belh leh, kumin chhunga ni khata hri kai thar an tam ber ni a ni. Nilaini khan 195 an awm bawk. Ningani-a hri kai hmuh chhuah thar zinga 128 hi Guwahati (Kamrup Metro) huam chhunga mi an ni a, Dibrugarh-ah 26, Kamrup Rural-ah 12 leh Tinsukia-ah 10 an awm bawk.

State puma Covid-19 hri kai hmuh chhuah tawh hi 2,19,272 tling tawhin, hri kai enkawl mek pawh 1,000 an chuang leh tawh bawk a ni.