Tripura Deputy CM-in Covid-19 a kai

Tripura deputy chief minister Jishnu Dev Varma chuan Covid-19 hri a kai tih Ningani khan a sawi.

Varma chuan hemi chungchang hi a twitter-ah tarlangin, "Covid-19 hri ka kai a, in lamah ka inkhung hrang nghal a ni," tiin midangte pawh hri leng laka an himna tura fimkhur turin a chah nghal a ni.

April 7 khan chief minister Biplab Kumar Deb chuan hri a kai thu hi a lo sawi tawh bawk a, doctor-te thurawn angin in lamah a inkhung hrang nghal tih a sawi. Hruaitu pahnihte hian Tripura Tribal Areas Autonomous District Council (TTAADC) inthlan tur atan campaign-in an chhuak nasa a, election rally-ahte telin, CM-in Covid-19 a kai tih hriatchhuah a ni hma darkar 24 chhung pawh khan vantlang inkhawmahte an tel dun a ni.

Tripura sorkar hian an state-a hri a len thar leh avangin kaihhruainna thar pawh a siam tawh a, sorkar office leh public place-ah face mask vuah ngei ngei tur a ni tih sawiin, he dan bawhchhiate chu a ṭum khatnaah Rs 200 chawi tirin, a ṭum hnihna aṭang chuan Rs 400 zel chawi tir an ni ang. Social distancing dan pawh zawm vek tura thupek tihchhuah a ni bawk.

Chief secretary Manoj Kumar-a'n thupek a tihchhuah tharah hian sorkar gym leh community hall-te chu khar tura tih a ni a, hei bakah hian sorkar office-a bio-metric attendance lak ṭhin pawh titawp rih tura tih a ni bawk a ni.

Sorkar thupek angin Inrinni apiangin Mask Enforcement Day hman a ni dawn a, mipui tamna hmun - bazar, shopping mall leh hmun dangahte enforcement team chuan face mask hmang lote dap hna an thawk ṭhin dawn a ni.