AP CM leh Governor-in state dinhmun sawidun
Arunachal Pradesh chief minister Pema Khandu leh governor Brig (Retd) BD Mishra-te chu Ningani khan Raj Bhavan-ah inkawmin, state chhung dinhmun leh hmasawnna hna thawh mek chungchangte an sawidun.
Meeting-ah hian Governor chuan tun hnaia New Delhi-a a zin ṭuma sorkar laipui aiawhte hnena an state tana rawtna hrang hrang a thlente CM hi a hrilh. Prime minister Narendra Modi-a'n ram puma Sainik School 100 hawn thar a tum chungchangte sawiin, he school-te hi an state-a din a nih ve theihna turin ṭan an lak a ngaih thu leh, institution dinna turin ruahmanna siam a ṭul thute a sawi.
Governor chuan Hollongi Airport project leh Changlang district-a Miao-Vijaynagar kawngpui siam hna thawk mekte chu zawh thuai a ṭul thu sawiin, CM-in state chhung hmun kilkhawr zawka chengte tlawh tura Changlang district-a Gandhigram leh Vijaynagar-a road journey leh trekking-a kal chu lawmawm a tih thu a hrilh.
CM leh Governor hian hripui leng mek chungchang pawh sawiin, hri leng laka invenna tura face mask vuah ṭhat a pawimawh thu te, social distancing dan zawm ṭhat leh kut sil ngun a ṭul thute an sawi a ni.