BJP-in AGP thawhpui tum tawh lo

Bharatiya Janata Party (BJP) chuan Assam-a an thawhpui, regional party Asom Gana Parishad (AGP) chu thawhpui chhunzawm a tum tawh lo tih a sawi.

BJP leh AGP hi Citi­zenship Amendment Bill chungchanga an dinna a inang lo a, hei vang hian thawhdun zel a harsa tawh dawn niin BJP hruaitu pakhat chuan a sawi. Hei bakah hian AGP chu BJP hmelma, Congress nen an tihṭhat avangin thawhpui zel a rem tawh lo tih a sawi bawk.

Citizenship Amendment Bill chungchanga party pahnihte ngaihdan a inan loh hnuah, AGP hruaitute chu party dangte thawhpui dan ngaihtuah an hmanhlel a, heng zinga hian Congress party ngei pawh an telh a ni, tiin BJP hruaitu chuan a sawi.

Hetihlai hian Assam Chief Minister Sarbananda Sonowal chuan a kaihhruai sorkara AGP minister pathum - Atul Bora, Keshab Mahanta leh Phani Bhusan Choudhury te banna thehluh chu Governor hnenah a lo thawn lo. Mahse assembly-ah chuan an ṭhuhna erawh sawnsak an ni tawh thung.

January 7 khan BJP kaihhruia NDA sorkarin Lok Sabha-a Citizenship Amendment Bill a pass avanga lungawi loin, AGP hi Assam-a BJP kaihhruai ṭangrual sorkar aṭangin a inhnukdawk a ni. Mahse BJP hian MLA 61 an neih avangin state sorkar din­hmun erawh a derthawn phah chuang lo. BJP sorkar hi Bodoland People’s Front (BPF) MLA 12 leh independent MLA pakhatin an thlawp bawk. AGP hian MLA 14 an nei a ni.

Congress party chuan AGP nena thawhdun chu an duh tih sawiin, party hruaitu pahnihte an inbiak mek thu a sawi.