Assam : Grand Alliance-in an candidate-te thukru

Assam assembly inthlan zawh fel ni tawh mah se, political party zinga candidate inleisak hlauhthawnna a lian nghal hle a, hei vang hian Congress kaihhruai ṭangrual pawl, Grand Alliance chuan an candidate-te chu state pawn lamah an thukru.

BJP leh a thawhpui party-te an candidate-a lei tuma an dawr hlauthawn avangin Congress, AIUDF leh BPF-te chuan inthlan result puan hmaa an candidate-te chu state pawn lamah dah an tum.

Zirtawpni liam ta khan Congress chuan an party candidate 20 chu Rajasthan-ah an hruai a, AIUDF pawhin candidate 22 a sawn chhuak bawk. Party pahnihte hian an candidate-te Jaipur-a Hotel Fairmont-ah an awmtir nia sawi a ni. He hmuna an awm chhung hian mobile phone pawh a hran vek pek niin, party dangte an biakpawh theih loh tura tih a ni.

BPF pawhin an party candidate-te chu Zirtawpni khan Kokrajhar-ah an ko khawm a, khawi hmunah nge dan an tum erawh hriat a la ni lo.

Polling station 4-a vote thlak hun puang
Election Commisison of India chuan Assam inthlan thawh hnihna, April 1-a neih ṭuma vote thlak ṭhat ngaihna tur, polling station palia vote thlak hun atan April 20 a ruat.

ECI chuan Ratabari consti­tuency-a Indira MV School (Right) polling station, Sonai constituency-a 463 Madhya Dhanehari LP School leh, Halflong constituency-a A Khothlir LP School leh Mualdam LP School polling station-ah vote thlak ṭhat a ni dawn tih a sawi a ni.

Indira MV School-a EVM hman hi BJP candidate Krishnendu Paul nupui car-ah hmuh a nih avangin vote thlak ṭhat a ni dawn a, A Khothlir LP School polling station-ah hian voter 90 an awm laiin vote 171 a tla bawk a ni. 463 Madhya Dhanehori LP School-ah hian vote thlak niin Assam Assembly speaker leh BJP candidate Aminul Haque Laskar chuan silai a hmetpuak a, mi pathumin hliam an tuar a ni.