Meghalaya tlawh turte tan in register lawk a ngai

Meghalaya sorkar chuan India rama hri leng thawh hnihna thleng mekah, hri laka invenna tura kaihhruaina siam ṭhain, an state tlawh tumte tan a hmain an lo in register lawk vek a ngai tih a sawi.

Inrinni liam taa kaihhruaina thar a tihchhuahah, state sorkar ram chhung state eng emaw zatah hri kai an pun thar leh nasat avangin an state-a hri a darh tur venna atan theihtawp chhuah a ngai tih a sawi a ni.

Principal secretary (health) Sampath Kumar chuan state dang aṭanga Meghalaya kal tumte chuan state sorkarin portal a siamah online registration an tih hmasak zel a ngai tih a sawi a, khualzinte hian Covid-negative certificate an nei ngei bawk tur a ni, a ti. Negative certificate nei pawh entry point-ah symptom nei nia hriat an nih chuan test nawn tir leh an ni ang. Hei bakah hian India ram pawn aṭanga lutte chu negative certificate nei pawh ni se kar khat chhung home quarantine tura tih an ni bawk.