UNC-in Manipur-a district siam thar pawm lo

Manipur-a Naga pawl lian ber, United Naga Council (UNC) chuan state sorkarin district pasarih a siam thar chu an pawm lo tih sawiin, sorkar chu a thutlukna siam tawh hi sut leh turin an phut tih an sawi.

Kar liam ta Zirtawpni khan UNC chuan Imphal-ah presidential council meeting, March 27-a district thar dinna tura state cabinet thutlukna siam chu an pawm lo tih an sawi. Sorkar laipui, Manipur sorkar leh UNC aiawhten district thar siamna tur chungchanga inbiakna an neih chu tihtawp lailawk rih a ni a, hetih laia district thar dinna tura state sorkar hmalakna zawng zawng chu an pawm thei lo tih an sawi a ni.

UNC chuan district thar pali din dan tur chungchangah Manipur leh Naga mipuite chuan kum 1981 December 1, 1992 November 10, 1996 Sepetember 27 leh kum 1998 June 23-te khan Memorandum of Understandings (MoUs) an ziak a ni, a ti. Hei bakah hian kum 2011, November 24 khan sorkar laipui pawh rawn inrawlhin, district siam tharin a nghawng tur Naga pawl hrang hrangte telin biakrawn vek an ni tur tih a rawn sawi niin an tarlang. Inremna an siam hi Naga lam chuan a vawng nung reng a, mahse Manipur sorkar chuan engmah rawn loin kum 2016, December 8 khan district thar pasarih a siam tih an sawi bawk.

District siam thar duh lohna lantirin UNC chuan kum 2016 khan national highway an dang a, ni 139 chhung nawrh an huaihawt hnuah an thil phut chungchangah sorkar laipui, state sorkar leh UNC aiawhte inbiakna, tripatite talk neih remtih a nih avangin kawngpui an dan pawh an titawp a ni.

State sorkar aiawhte nen ṭum kua zet an inbe tawh a, district thar pasarih te ṭhiat leh tura an phutna chu ala ngai reng tih an sawi. Mahse tun thlengin state sorkar chuan an thil phut chungchangah hma lakna a la nei lo a ni, an ti.