Manipur sorkar in State chhunga retheihna tibo tum

Manipur Chief Mi­nister N Biren Singh chuan state chhunga retheih­na tihbo an tum tih sawiin welfare scheme-te pawh a dawngtu turten a huna an dawn ngei theih nan hma an la dawn tih a sawi.

Biren Singh hian Pathianni khan Imphal West district-a revamp school a hawng a, thu a sawinaah sorkar inrel­bawlnaa awm mek chu tihṭhat chhoh tum a nih thu a sawi. An tum tih­hlawhtlinna atan mission pawimawh tak tak pahnih- ‘Go to Hills’ leh ‘Go to Village’-te chu nikum lam khan an tlangzarh tawh tih sawiin, tlangram leh ruama chengte tana hmasawnna tura tih a nih thu a sawi bawk.

Singh chuan he scheme hi thlatinin ennawn ṭhin a nih dawn thu leh, a hlawkna teltu turte pawhin a hun takah a hlawkna an tel theih ngei nan hma an la dawn tih a sawi. Sorkar chuan Manipur-ah retheihna umbo ngei an tum tih sawiin, electric leh gas connection-te pawh sorkar office kawta intlar ngai loin a hun taka pek a nih theih nan hmalak an tum tih a sawi.

Zirna chu hmasawnna kawng hrang hrang atan thil pawimawh a nih thu sawiin, zirna kawnga an mission pawimawh ‘School Fagat Hansi’ emaw ‘Let’s make schools better’ emawte chu zirna kawnga hmasawnna thlenna tura tih a nih thu a sawi a ni.