Bhaichung-a party-in Sikkim seat chuh kim dawn

India football captain hlui Bhaichung Bhutia kaihhruai, Hamro Sikkim Party (HSP) chuan an state Assembly seat 32-ah leh Lok Sabha seat pakhat an neih chu chuh an tum tih an sawi.

Footballer hlui Bhaichung Bhutia chuan Pathianni khan press conference-ah an party chuan seat awm zawng zawngah chuh an tum tih sawiin an slogan atan ‘Hamro Sikkim, New Sikkim’tih an hmang dawn tih a sawi a ni.

Sikkim Democratic Front (SDF) khing tura regional party dangte thawhpui an tum tih sawiin, Bhutia chuan tualchhung party ṭhen­khatte nen chuan an thawhdun a beisei thu a sawi. National party

ṭhenkhat nen thawkhoa sawi an nih chu thu dik lo a ni tih thu leh, BJP nena thawkho tur anga thuthang awm pawh a dik lo tih a sawi a ni.

Pawan Kumar Cham­ling sorkar chu inṭhen­hranna politics khelah puhin sakhuana leh hnam ang zawnga mipuite ṭhen­darh tumah a puh. Bhutia chuan hmasawnna chu an party agenda pui ber a nih dawn thu a sawi bawk.

An party chuan cri­minal case nei chu ticket an pek dawn lo thu sawiin, kumin neih tura ruahman Assembly inthlanah pawh din a tum tih a sawi a ni.

Kum 43 mi Bhaichung Bhutia hi HSP working president a ni mek a, 2014 Lok Sabha inthlanah pawh khan a ding tawh a, mahse a tling zo lo a ni.