Union Home Minister in Assam tlawh

Union Home Minister Rajnath Singh chuan Thawhlehni khan Guwahati thlengin India-Bangladesh border Dhubri-a BOLD-QIT (Border Electronically Dominated QRT Inter­ception Technique) project a hawng.

Thawhlehni tlai dar 4 velah khan Guwahati-a Lokpriya Gopinath Bordoloi International (LGBI) thlengin Assam Chief Minister Sarbananda Sonowal chuan a lo hmuak a ni.

BOLD-QIT project hian BSF-te chu Indo-Bangla border an venhimna kawngah awlsam zawkin sensor hrang hrang an enfiah thei dawn a ni.

Home Minister Rajnath Singh chuan Prime Minister Narendra Modi-a kaihhruai sorkar chuan India venhimna turin engkim an huam thu leh an inphah hniam dawn lo tih sawiin tunhnaia Indian Air Force (IAF) in Pakistan an beihna chu a ram tana an inhlanna tilang chiangtu a nih thu a sawi. Martar 40-te thihna chu a thlawnin kan kaltir dawn lo tia sawiin India chawhbuai tumtute chu kan ngaidam dawn lo a ni, a ti.

Prime Minister in a ṭul hunah chuan terrorist camp kan tichhe dawn tiin a sawi a ni, a ti bawk. Venhimna chu sorkarin a ngaihpawimawh ber a nih thu leh, venhimna a awm loh chuan hmasawnna a awm thei lo tih a sawi. "Kan sorkar in thuneihna kan chan aṭang khan, ramchhung venhimna kawnga thil inthlak hmuh theihin a awm a, hmarchhak bikah a nasa lehzual," tiin a sawi.

Rajnath Singh chuan an sorkar chu an nghet ṭha hle tih sawiin, ramchhung venhimna tur a nih chuan an inphah hniam dawn lo tih a sawi. An sorkarna chu chhunzawm a nih dawn leh dawn lohah an buai lo tih sawiin ramchhung him chu an ngaipawimawh zawk tih a sawi a ni.

IAF in beihpui an thlaknaa thi leh hliam awm zat zawhna an siam chungchangah eptute chu bei zuiin Rajnath Singh chuan chutiang thil chu politics kalphung a ni lo, a ti. "IAF in beihpui an thlakah khan terrorist engzat nge thi tih min zawt a ni. National Technical Research Organisation (NTRO) chuan mobile phone 300 beihpui an thlakna hmunah khan a nun thu an sawi. Tunah mobile phone la hmangtu chu mihring, thingkung nge thla an nih chhiar ve tawh mai rawh u", tiin a sawi bawk.

Politics chu ram siamna atana hman tur a nih thu leh hetiang issue-ah hian hman tur a nih loh thu a sawi. Singh chuan kum nga kalta chhung khan India economy chu nasa taka a ṭhan thu leh 2028-ah chuan khawvela a ber pathum zingah a tel dawn tih a sawi a ni.

Modi sorkar chuan Assam Accord clause 6 kalpui an tum hle tih sawiin, hmarchhak mipuite nihphung leh tihdan phungte chu humhim a ni dawn tih a sawi bawk.