AGM-in vote chhiar lai video-a lak vek phut

Assam-a Congress kaihhruai eptu ṭangrual pawl, Mahajoot-a tel, Anchalik Gana Morcha (AGM) chuan Pathianni khan Election Commission of India hnenah May 2-a an state-a vote tla chhiar lai chu video-a lak vek tura an phut thu an thlen.

EC hnena lehkha an thawnah, AGM president leh Rajya Sabha member Ajit Kumar Bhuyan chuan assembly inthlan buaipui chungchangah Commission chu state bureaucracy-te chungah a innghat tih sawiin, hetih lai hian sorkar hnathawk ṭhenkhat chuan rorellai BJP chu an duhsak hle a, hei vang hian vote chhiar laiin thil dik lo an tih palh a hlauhthawnawm a ni, a ti.

"Vote chhiarte dik leh felfai tak, langtlanga kalpui a nih theihna turin EC chu Conduct of Election Rule, 1961-a tarlan ang leh hriattirna a lo tihchhuah fo tawh angin theihtawpa a ṭul anga hma la turin kan ngen a ni. Langtlang taka kalpui a nih theihna tura hmalakna pakhat chu vote chhiar chhung zawng video hmanga lo lak hi a ni," tiin AGM President chuan a sawi.

Assam assembly inthlan hi March 27, April 1 leh April 6 khan neih a ni a, vote tlate hi May 2-ah chhiarin inthlan result hi puan a ni ang.