Bihu organisation 30-ten nawrh huaihawt

Assam festival lian ber leh pawimawh, Rongali (Bohag) Bihu lawm dan tur chungchanga sorkarin kaihhruaina a siam duh loin, Pathianni khan Bihu organisation 30-te chuan lungawi lohna an lantir a, sorkar chu khuahkhirhna a siamte thlahdul turin an ngen.

Assam sorkar chuan hri leng a hluar thar leh avangin Bihu festival lawm dan turah Bihu organizing committee-ten an zawm tur kaihhruaina a tichhuak a ni.

Bihu organizing committee lian ber, Brihattar Guwahati Bihu Sanmelani Samanway Raksha Samiti advisor Kailash Nath Sharma chuan sorkarin kaihhruaina a siam anga Bihu festival lawmna zan dar 11-ah titawp vek tura tih chu thil harsa tak a ni dawn tih a sawi. "Bihu festival lawmna hi zan rei lamah neih ṭan niin, a tuk zing dar 5-6 thleng te a awh thin a, hei vang hian SOP hi siamṭha turin kan ngen a ni," a ti.

Sharma chuan, "Bihu function hi open space-ah neih a ni ṭhin a, hei vang hian organizing committee tan sorkar emaw, district thuneitute emaw hnenah function-a tel tur zat lo hriattir lawk theih a ni lo," tiin organizing committee tan pawh function neihna tur hmun chu a zau tham ṭhin avangin lo sanitize theih a nih lo tiin, sorkarin festival lawmna hmun ni khatah vawi hnih sanitize tura a hriattirna chu a chhang bawk.