Sikkim-ah Covid-19 vei 18 chhui zui theih loh

Sikkim health department chuan an state-a Covid-19 hri kai hmuhchhuah zinga 18-te chu an awmna chhui zui theih lohin an awm tih a sawi.

Pathianni khan Sikkim-ah hian hri kai thar mi 54 awmin, kumin chhunga ni khata hri kai thar an tam ber ni a ni. Hri kai thar zingah hian tun hnaia chief minister Prem Singh Golay ruala Gujarat-a zin, member 150 awmna contingent zingah mi eng emaw zat an tel.

Health department official Sonam Bhutia chuan hri kai hmuh chhuah, chhui zui theih loha awm zinga a tam ber chu tourist an ni tih a sawi a, coronavirus an kai tih an hriat hnuah hmun dangah an tlanchhe zui nia a rin thu a sawi. STNM Hospital-a Covid-19 an kai tih hriatchhuah tourist pathumte chuan an thlenna hotel hming an sawi duh loh tih a tarlang bawk. "Hri kai hmuh chhuah zinga mi, Kolkata aṭanga rawn kal khualzin pahnih chu an tlanbo a, Bangalore aṭanga lo kalte chuan an phone an pick up duh lo bawk a ni," a ti. Maharastra aṭanga kal, khualzin pahnihte chu Covid-19 hri an kai tih an hriattir an nih chuan Sikkim an chhuahsan tawh tih a sawi bawk.