Meghalaya: KHADC MDC-ten lalut

Meghalaya-a East Khasi Hills Deputy Co­mmissioner, Matsiew­dor War chuan Nilaini khan MDC thlantlin thar 29-te chu thutiam lak tirin a lalut.

MDC thar 29 zingah hian Sohryngkham, Pyniaid Sing Syiem leh UDP MDC Mawlai, Teibor Pathaw-te chuan Khasi ṭawngin thutiam hi an la a ni.

Shella UDP MDC, Teinwell Dkhar leh Mawkhar-Pynthorum­khrah NPP MDC, Pyn­shngain N Syiem-te chu Chief Executive Member (CEM) leh Khasi Hills Autonomous District Council Chairman (un-contested)-te an ni dawn nia tarlan a ni bawk.

Nimina vote lak tura ruahman heng post-ah te hian Congress chuan din an tum lo nia thuchhuah an siam avangin Dkhar leh Syiem-te hian chuhpuitu awm loin heng post pawimawh tak takte hi an luah dawn nia tarlan a ni.

Dkhar leh Syiem-te hi United Democratic Alliance (UDA) candidate ve ve niin Nilaini khan Secretary of the Legislative of the Council hnenah heng post-a ding tur hian nomination an thehlut. Syiem chuan reporter-te hmaah eptu party Congress chuan an mamawh ang zat member an neih loh avangin nomination hi thehluh an tum lo tih thu an dawng tih a sawi.

Post pahnih an chuh leh turah chuan hnehna an chang ngei dawn tih a chiang tih sawiin, UDA chuan member 19 an neih thu sawiin heng zingah MDC pakuate chu Regional Democratic Alliance (RDA) an nih thu leh MDC 10-te chu People’s Democratic Alliance (PDA)-te an nih thu a sawi a, an vai hian NPP kaihhruai sorkar-a tel vek an nih thu a sawi a ni.

Congress Parliamen­tary Party spokesperson, Ronnie V Lyngdoh chuan member ma­mawh zat an neih tlin loh avangin heng post lian pahnihte hi chuh an tum lo tih sawiin, eptu pawla ṭana khalhngiltu zawk nih chu an tum ta tih a sawi ve bawk.