Zirlai pawlin Assam excise lakah FIR thehlut

All Assam Tea Tribes Students’ Association (AATSA) chuan Assam-a Jorhat district excise department-te lakah FIR an thehlut.

Zirlai pawlte hian zu lakluh an enfiah uluk loh vangin excise department lakah hian FIR hi an thehlut a ni.

Kar liamta mai khan Assam-ah hian zu chhe in vangin mi tam tak an thi a, Jorhat district-ah pawh hian mi 62 an thi a ni.

AATTSA assistant general secretary Dhiraj Gowala chuan police-te pawhin superintendent of excise, excise inspector leh excise sub-inspector-te lakah FIR an thehlut tawh tih sawiin, Jorhat district-a zu lakluh an enfiah ṭhat tawk loh avangin an lakah hian FIR hi thehluh a nih thu a sawi.

District excise department-te chuan an hna an thawh ṭhat loh avangin an district-ah mi 62 in an thih phah tih sawiin Dhiraj Gowala chuan thil dik lo titute chu danin a phut angin hrem an ni ngei tur a ni, a ti.

Times of India report in a tarlan dan chuan Jorhat police officer pawhin excise department hotute lakah hian FIR hi thehlut ngei tih a sawi tawh a, thubuai an ziahlut tawh thu sawiin Indian Penal Code Section 119 hnuaiah thubuai an ziaklut tih a sawi. Police office chuan an chhuizui mek tih a sawi bawk.

Assam-a Jorhat leh Gola­ghat district-a zu chhe in vanga mi tam tak an thih hnu hian police leh excise department-te chuan zu enfiah beihpui an thlak nghal a, mi 50 vel chu an man nia tarlan a ni. Heng an mi man te hi dan loa zu lakluh kawngah an inhnamhnawih nia tarlan a ni.

State sorkar chuan zu chhe in vanga thi chhungte hnenah hian zángnadawmna atan cheng nuai hnih ṭheuh an pe dawn tih an sawi a, damdawi-ina awmte hnenah pawh cheng 50,000 ṭheuh an pe dawn tih an sawi bawk.

Congress party chuan state excise minister Parimal Sukla­baidya leh excise official-te lakah complaint an thehlut tawh bawk a ni. Congress leh Krishak Mukti Sangram Samiti (KMSS)-te chuan Parimal Suklabaidya hi bang tura an phut thu an sawi tawh bawk a ni.