Andy Murray a dam tawh?

World number 1 hlui Andy Murray chuan a khel bawr hliam a dam tawh thu a sawi a, mahse Wimbledon-ah singles match khelh theih a beiseina chu 50% aia hniam a nih thu a sawi chhuak.

Britain fachuam hi a vawi hnih nan January thla khan zai a ni, zaina ngaia zai nawn an nih hian tennis player zingah singles match ṭha taka khel chhuak leh thei an awm tawh ngai meuh lo.

Kum 31 mi Murray chuan, "Inelna tluang taka neih a ni a, muangchang deuh mah se ka tluang rih viauin ka hria. Australian Open dawna ka sawi tawh ang khan inkhelh leh theih ka duh, mahse ka thei ngei ang em tih chu ka chiang rih bik lo," tiin a sawi.

Tennis a khelh hun chhungin Murray hian nomawi 45 a chawi hman a, heng zingah hian Grand Slam title pathum leh Olympic gold medal pakhat a tel - a kum la tam lo mah se hliam khirh tak a neih avang hian a tum aia hmain tennis khelh a chawlhsan a ngai dawn niin a lang.

Hma hun chungchang sawiin Murray chuan, "Rang takin ranking neih san leh nghal chu a awlsam dawn lo. A sang 50 aṭanga 100 inkar hi chu beiseina a awm, mahse a sang zual 10 zinga tel erawh thil theih loh tluk a ni rih ang.

"Tennis court-ah ka kir leh ngei ang em tih chungchangah pressure ka insiam duh lo, tennis ka khel leh ang em tih leh Wimbledon ka khel ngei ang tih pawh sawi theih a la ni lo. Duhthusamah chuan ka khel bawr hi dam phawt se, chumi hnuah ka inkhel leh thei a nih chuan a lawmawm khawp ang," tiin a sawi.