Smart City Project kaltlangin Hmarchhak ṭhang nasa dawn: PM

Prime Minister Narendra Modi chuan Ningani khan Smart City Project chuan hmarchhakah hmasawnna nasa tak a thlen dawn tih a sawi.

PM Narendra Modi chuan Smart City Project kaltlangin hmarchhak chu a ṭhang nasa dawn tih a sawi a, mipuite buaina leh harsatna te pawh chinfel a ni dawn tih a sawi. Project hmang hian danglamna thlen a ni dawn tih sawiin, hmarchhak state-te chuan hmasawnna leh ṭhanna nasa tak an hmuh dawn thu a sawi a ni.

Narendra Modi hian Ningani khan New Delhi aṭangin video conference kaltlangin Smart City Project-a Integrated Command and Control Centres (ICCC) panga, Arunachal Pradesh, Sikkim leh Tripura-a khawpui pangaa project kalpuina tur lungphum phumna hun a hmang a ni.

Modi chuan Smart City Pro­ject hnuaiah hian hmarchhak state pariata khawpui 10-ah project 500, cheng vaibelchhe 15,000 man hu kalpui a ni dawn tih a sawi.

Khawpui tinte chuan an har­satna leh an buaina zualpuite an hriatfiah tawh thu sawiin heng zawng zawng hi kumin chhung emaw 2020-ah emaw chuan chinfel vek a nih tawh dawn thu a sawi bawk.

Traffic management, trans­portation, waste management, energy conservation, drainage system leh water supply-te chu enfiahna hnuaiah digital techno­logy hmangin kalpui a ni dawn tih a sawi. Modi chuan hmeichhe laka pawikhawihna thlen te, mipuite mamawh tlang­lawn te, tui dahkhawl, in leh mihringin an mamawh thil hrang hrangte chu ICCC hmang hian ngaihven vek an ni dawn tih a sawi bawk.

Smart City Project kaltlang hian mipuite chuan a thlawnin WiFi hotspot tam tak hmangin internet an khawih thei tawh dawn tih a sawi a ni.