JMB hel Police kutah awm NIA in thu zawt fiah dawn

India rama awm firfiak pawl Jama’atul Mujahideen Bangladesh (JMB) mi pakhat, Thawhlehni-a Tripura-a man chu Nilaini khan police kutah ni 12 chhung awm turin court chuan thutlukna a siam.

Police-te chuan JMB firfiak an man chu Nazir Shaikh (25) a nih thu an tarlang tawh a, police-te leh intelligence-te chuan police kuta a awm lai hian thu an zawtfiah dawn tih an sawi bawk.

Police-te chuan Thawhlehni chawhnu lam khan an thu­dawn bawhzuiin Shaikh hi state khawpui Agartala khaw dai thlang lama awm, Arundhi­tinagar-ah an man tih an sawi a, karhnih liamta chhung khan Arundhitinagar-a private construction firm-ah a thawk tih an sawi a ni.

National Investigation Agen­cy (NIA) official-te pawhin Shaikh hi thu an zawtfiah dawn a, Nilaini zana thu an zawhfiahnaah a ṭhiante nen Bengaluru-ah pawi an khawih tih sawiin eng pawi chiah nge an khawih erawh a sawilang lo thung.

Tripura Director General of Police (DGP) Akhil Kumar Shukla chuan an mi man chu Bangladesh leh India ramchhunga pawikhawihna hrang hrangah a inhnamhnawih tih a sawi bawk.

Shaikh hi West Bengal Murshidabad district mi a nih thu tarlan niin, IED expert a nih thu pawh tarlan a ni.

Akhil Kumar Shukla chuan Shaikh chu nikum January-a Bodh Gaya bomb puakah pawh khan a inhnamhnawih tih sawiin, Lok Sabha inthlan dawn hnaiha Tripura-a a luh chhan chiang taka hriatfiah an tum tih a sawi bawk.