Hri leng dona kawngah party-te thawk ho turin AP Governor-in ngen

Arunachal Pradesh governor Brig (Retd) BD Mishra chuan an state-a political party hruaitute chu hri leng dona kawngah thawk ho a, party inmil lohna te chu dah ṭha turin a ngen.

Thawhṭanni khan Raj Bhavan-ah hri leng dona kawnga hma lak dan tur ngaihtuahin political party hrang hrangten joint meeting an nei a ni.

Governor chuan political party hruaitute hnenah hri leng dona kawngah hma hruai turin a chah a, hri laka invenna tura kaihhruaina siamte mipuiin an zawm ṭhat theihna tura hma hruai tur leh, theihtawpa fimkhur turin a chah.

Mishra chuan, "Mi mal tin nunna hi a hlu em em vek a ni. Hei vang hian he hri laka mitinte kan himna turin ṭan kan lak a ngai a ni," tiin Covid-19 vaccine lak a pawimawh thute mipuite zirtir ṭha turin meeting-a kalte chu a hrilh.