Hmarchhak bialah hri kai thar 666 awm

Hmarchhak bialah Thawhṭanni khan Covid-19 hri kai hmuh chhuah thar mi 666 an awm a, heng zinga mi 583 chu Assam state-a hmuh chhuah an ni.

Assam-ah hian hri kai hi an pung chho chak leh ṭan hle a, hri kai enkawl mek pawh 2,387 an tling leh tawh a ni. Hri kai an pun zel lai hian state mipuite chu an festival pawimawh tak, Boag Bihu festival lawm turin an inbuatsaih mek. State sorkar chuan festival lawmna atana kaihhruaina a siamte chu a tichhuak tawh a, hetihlai hian festival lawmna buatsaihtu hrang hrangte chuan sorkarin khuahkhirhna a siamte chu thlahdul turin an phut thung.

Thawhṭanni hian hmarchhak state tinah hri kai thar hi hmuh an ni vek a, Arunachal Pradesh-ah 6, Manipur-ah 18, Meghalaya-ah 26, Mizoram-ah 7, Nagaland-ah 11, Sikkim-ah 5 leh Tripura-ah mi 10 in hri an kai thar a ni.