Assam-in air passenger tan SOP thar siam

Assam sorkar chuan an state-a hri kai an pun chhoh chak leh tak avangin thlawhtheihna hmanga an state lut turte tan Standard Operating Procedures (SOP) thar a tichhuak.

Principal secretary, health and family welfare, Samir Kumar Sinha chuan SOP thar hi tichhuakin, thlawhtheihna hmanga lutte chu airport-ah Rapid Antigen Test (RAT) an tih vek a ngai a, positive te chu home isolation emaw, private/sorkar health institution-ah an dinhmun azirin dah an ni ang. RAT hi a thlawn veka tihsak an ni dawn a, RAT negative erawh chu airport-ah tho Rs 500 chawiin RT-PCR test an tih leh a ngai dawn a ni.

Kaihhruaina siam zawm lote chu Disaster Management Act, 2005 section 51-60 bakah IPC section 188 hnuaiah thubuai siamsak theih an ni dawn tih thuchhuah chuan a tarlang bawk.  Assam-ah hian March 27, April 1 leh April 6 khan assembly inthlan neih a ni a, inthlan neih zawh hnuah Covid-19 hri kai hi 732% zetin an pung tawh a ni.

Assam health department-in a tarlan danin, Election Commission-in an state-a assembly inthlan neih hun tur a puan ni, February 26 khan hri kai mek hi 287 chiah an awm tawh a, mahse Thawhlehni khan hri kai mek hi 2,387-ah a pung chho tawh a ni.

Meghalaya-in total lockdown puan tum lo
Meghalaya sorkar chuan an state-ah Covid-19 hri kai pun chho leh mah se total lockdown puan tumna a awm lo tih a sawi. Hemi rual hian hri darh zel tur venna atan khuahkhirhna khauh zawk erawh siam a ni tih a puang.

Thawhlehni khan Meghalaya-ah hian hri kai thar 87 an awm a, kumina ni khata hri kai thar an tam ber ni a ni. Hri enkawl mek, active case pawh 270-ah an pung chho tawh.

Hri darh tur venna khuah­khirhna khauh zawk siamin, dawr, sumdawnna hmun leh restaurant-te chu zan dar 9 thleng bak inhawn khap a ni. East Khasi Hills district-ah zan dar 10 aṭanga a tuk zing dar 5 thleng curfew puan a ni bawk a, pawn chhuahnaa hmai tuamna hmang lote sum chawitir ṭhin chu Rs 500 aṭangin Rs 1,000-ah tihpun a ni bawk.