AP-ah NSCN hel pariat sorkar kutah inpe

Arunachal Pradesh-ah National Socialist Council of Nagalim (NSCN) hel pariat chu Thawhlehni khan Arunachal Pradesh police leh Assam Rifles joint team hmaah an inpe.

Hel inpete hi NSCN-KYA member panga leh NSCN-R member pathum an ni a, an zingah hian an pawl awmnaa dinhmun pawimawh tak tak chelh, mipui hnena chhiah khawnna kawngah hma latu te pawh an tel nia sawi a ni.

Sorkar thuchhuah chuan Longding police leh Assam Rifles-ten helho hnenah kawng dik zawh a, an helna bansana sorkar kuta inpe tura sawma theihtawp an chhuahna chuan rah ṭha a chhuah chho zel niin an sawi.

Hel inpete hian an dinhmun hrehawm ziate sawiin, an ṭhian dangte pawh tharum thawhna bansan a, nun thar ṭan tura police leh thuneitute kuta inpe turin an sawm ve nghal bawk.