Tripura : Tribal council CEM atan Pradyot lalut dawn

Tripura Tribal Areas Autonomous District Council (TTAADC) inthlan neih zawh taka hnehna changtu, Tipraha Indigenous Progressive Regional Alliance (TIPRA) chairman Pradyot Kishore Deb Barman chu April 20 hian chief executive member (CEM) thar atan lakluh a ni dawn.

Seat 30 awmna TTAADC-a seat 28-a inthlan neihah TIPRA leh Indigenous National Party of Twipra (INPT) thawkdun chu hneh taka thlan tlin niin, seat 18-ah hnehna an chang a ni. BJP chuan seat kua lain, independent candidate-in seat khat a la bawk. Inthlanah hian vote 85% chuang a tla a ni.

Council member thar lakluh inkhawm hi April 20 hian Khumulwng-a Nuai Auditorium Hall-ah neih a ni dawn a, he hunah hian hri leng vanga inkaihhruaina siamte zawmin mi tlemte chauh an tel thei ang.

TTAADC hi kum 1982, January 15-a din a ni a, a huam chin hi sq km 7,132.56 niin hei hi Tripura state pum zau zawng aṭanga 70% a tling pha a, Tripura mipui hmun thuma ṭhena hmun khat a huam a ni.