Meghalaya BJP in thawhpui nei dawn lo

Meghalaya Bharatiya Janata Party (BJP) chuan, Lok Sabha inthlan awm turah party dang thawhpui an neih dawn loh thu leh Parliamentary seat pahnih - Tura leh Shillong-ah candidate an neih ve ve dawn thu an sawi. Meghalaya-ah hian BJP hi NPP kaihhruai Democratic Alliance sorkar-ah an tel thung.

BJP general secretary in-charge of North East, Ajay Jamuwal kaihhruaina hnuaia meeting an neihnaah thawhpui nei lo tura thutlukna hi siamin he meeting-ah hian state party leader-te leh worker-te an tel ṭha hle a ni. BJP state leader leh cabinet minister AL Hek chuan Lok Sabha inthlanah ding turin a thuphung chuan thu an titlu tawh tih sawiin, election committee pawh an din thuai dawn tih a sawi.

BJP minister chuan thu­tlukna hi Thawhlehni khan an siam tih sawiin national president Amit Shah pawh hriattir a nih dawn thu a sawi. Meghalaya seat pahniha ding tur hian mi pali panga vel chuan an be tawh tih sawiin thutlukna erawh state election committee kutah a awm dawn tih a sawi a ni.

Hetih lai hian MDA sorkara regional party lian ber UDP chuan an general secretary Jemino Mawthoh chu a ding dawn tih an sawi tawh a, mahse regional party dang HSPDP, PDF leh KHNAM-te chuan engmah an la sawi lo thung. Hek chuan seat pahnihah hian hnehna an chan ngei a rin thu sawiin, 1984-ah khan MP pahnih chiah nei mah se tunah chuan BJP chu ramchhunga party lian ber an ni tawh tih a sawi.

BJP state president Shibun Lyngdoh chuan a tirah chuan an party chuan thawhpui tur an ngaihtuah tih sawiin MDA an ngaihchan thu a sawi a, mahse MDA hian Thawhlehni thleng khan engmah thuchhuah an neih loh avangin thutlukna dang hi an siam ta tih a sawi a ni.