Meghalaya: Vawk farm hmasawnna turin Rs. vbch. 220 dawng dawn

Meghalaya Deputy Chief Minister, Prestone Tynsong chuan Inrinni khan piggery and livestock farming atan National Cooperative Development Corporation (NCDC) kaltlangin sorkar laipui aṭangin cheng vaibelchhe 220 an dawng dawn tih a sawi.

Inrinni khan hun rei tak tih­khawtlaia awm tawh, Mawlai Mawiong-a Multi-Species Modern Abattoir project hawnnaa thu a sawinaah Prestone Tynsong chuan sorkar laipuiin a rang thei ang berin cheng vaibelchhe 220 pek an tiam thu hi sawiin, hemi hmang hian state sorkar chuan piggery leh livestock farming kalpuitute tan soft loan an pe dawn tih a sawi a ni.

Tynsong chuan state in kumkhat chhunga vawksa an mamawh zat chu metric tonne 41,000 a nih thu sawiin state chuan metric tonne 31,000 an tharchhuak hman tih a sawi bawk.

Multi-Species Modern Abattoir project chungchang pawh sawiin Dy. CM chuan abattoir project kaltlang hian khawpuia chengte chuan sa hrisel zawk lei tur an neih dawn thu leh veterinarian-te endik thlap sa an zawrh dawn thu a sawi a ni.