Student stipend chungchanga Minister thusawi danah AAPSU lungawi lo
Arunachal Pradesh education minister Taba Tedir-a'n students stipend chungchang a sawi danah All Arunachal Pradesh students’ Union (AAPSU) chu an lungawi lo hle a, Minister chu zirlaite dinhmun hriathiam pui lo leh ngaihsak loah an puh.
Tun hnaia interview a neihah Minister Tedir chuan Covid-19 hri leng vanga physical class kalpui mumal a nih loh vangin zirlaite hnenah kumin chuan stipend a full-in pek a ni dawn lo tih a sawi a ni.
AAPSU chuan minister thusawi chungchangah an lungawi lohna thuchhuah siamin an tarlang a, "Education minister thusawi hian zirlaite rilru a ti nain, a ti lungawi lo hle a ni. Hripui leng vangin physical class neih mumal ni lo mah se, online class neih reng niin zirlaite pawhin fee an chawi reng a, library fee, exam fee, games and sports fee bakah fee dangte pawh an pe vek tho a ni," tiin AAPSU general secretary Tobom Dai chuan a sawi.
Hri leng vanga online-a class kalpui a nih avangin zirlaite chuan smartphone an neih a ngai a, net charge pawh ṭum dang aiin an seng hnem zawk a ni tiin zirlai pawl chuan an thuchhuahah an tarlang.
AAPSU aiawhte hian student stipend leh scholarship chungchangah hian thuneitute pawh an lo dawr tawh a, stipend hi zirlai 16,374 in dilin a file pawh thuneitu sang lamah thlen a ni tawh a ni. Zirlaite stipend leh scholarship dawn tur zat hi pawhpen a, an dawn tur ang zat pek an ni loh chuan AAPSU chu a ngawi mai mai dawn lo tih sawiin, stipend pawh a rang thei anga bera zirlaite hnena pechhuak turin state sorkar an phut thu an sawi bawk.