Tripura CM nupuiin Covid-19 hri kai

Tripura chief minister Biplab Kumar Deb-a'n Covid-19 hri a kai tih hmuh chhuah a nih hnuah, a nupui Niti Deb pawhin hri a kai tih hriat a ni ve leh a, hei hi Covid-19 positive a nih ṭum hnihna a ni.

Niti Deb chuan nimin khan a Facebook-ah Covid-19 a kai tih hi a sawi a, thla 8 chhungin a ṭum hnihna atan hri hi a kai leh tih a sawi. Nikum August thla khan Niti Deb leh a fanu Shreya Deb-te chuan Covid-19 hri hi an lo kai tawh a ni. Niti Deb chuan Covid-19 hri chi hran leng chu inkaidarh a awlsam a, a kaite pawh ni 9-10 chhung chu khawsik sang tak neiin immune system a khawih pawi thei tih sawiin, mipuite chu hri leng laka theihtawpa fimkhur turin a chah nghal a ni.

Tripura deputy chief minister Jishnu Dev Varma pawhin hri hi a lo kai tawh bawk a ni.