Sikkim CM-in sorkar hnathawkte sawisel

Sikkim chief minister Prem Singh Golay chuan an state-a sorkar hnathawkte chu an mawhphurhna ngaihthahah puhin a sawisel.

Nilainia Gangtok-a Ambedkar Jayanti lawmna neihah sorkar hnathawk, a bikin officer tel an tlem avangin CM hi a lawm lo hle a, "Sorkar hnathawk tam tak chuan national festival-a tel chu an tihtur nia ngai loin, holiday angah an ngai ringawt a ni. Mipuite chhiahhlawh, mipui rawngbawltu an ni tih hi an hrethiam lo a, hriatthiam pawh an tum lo niin kan ngai a ni," a ti.

CM chuan sorkar hnathawkte chu sawisel chhunzawmin, "Tam takin an hnathawh hun bithlaih, zing dar 10 aṭanga tlai dar 4 inkar tih chu an zawm duh lo a ni. Chhun lai thlengin tam tak chu office-ah pawh an thleng hman lo. An thla tin hlawh an lak reng avangin hloh tur nei lo niin an inhria a ni. Mahse hna an thawh ṭhat loh vanga tuartu ber chu mipui nawlpuite an ni leh ṭhin a ni," a ti. Sorkar chuan a hnathawkte chu a duatin a duhsak hlawm a, an ṭhatna tur ngaihtuahin dan pawh an ṭhiah phah fo niin a sawi. Hetih laia mipui rawngbawltu an nih tih ngai pawimawh lo, sorkar hnathawkte chu voluntary retirement dil mai turin a ti a ni.