BJP kaihhruai NEDA in hmarchhakah Seat 19-21 la dawn: Sarma

Assam Finance Minister Himanta Biswa Sarma chuan Pathianni khan Bharatiya Janata Party(BJP) leh an thawhpui NEDA chuan hmarchhaka Lok Sabha seat 25 awmah 19-21 vel an la dawn tih a sawi.

Prime Minister Narendra Modi kaihhruaina hnuaiah Lok Sabha inthlanah hnehna an chang leh dawn tih sawiin 2014 aiin an cheṭha zawk dawn tih a sawi bawk.

Himanta Biswa Sarma chuan hmarchhakah Lok Sabha seat 25 a awm tih sawiin, BJP leh an thawhpui, North East Democratic Alliance (NEDA) member-te chuan seat 19-21 an la dawn a, Assam-ah bik chuan seat 9-11 an la dawn tih a sawi a ni.

Biswa Sarma chuan Lok Sabha inthlanah chuan a ding ve maithei niin a sawi bawk. Mahse an party thutlukna a nih thu sawiin, an party in an remti a nih chuan a din ve tur thu a sawi.

Assam-ah bik hian LS inthlan hi thawh thumah neih a ni dawn a, April 11, 18 leh 23-ah te hian neih a ni ang. Assam-ah hian constituency 14 a awm a ni. Manipur leh Tripura-ah seat hnih ve ve awmin Nagaland, Sikkim leh Mizoram-ah seat khat ṭheuh a awm a, Arunachal Pradesh pawhin seat hnih an nei ve bawk.

Sarma hian Bokakhat-a hun a hmannaa media mi ten an kawmnaah Assam-a party dangte an thawhpui dawn em tia zawhna chu chhang duh loin state unit President Ranjit Dass chhan tur a nih thu a sawi thung.

BJP hian Citizenship Amenment Bill vang khan a thawhpui lian tak Asom Gana Parishad (AGP) chu a chan tawh a, NPP pawhin CAB vang khan chhuahsan an lo tum tawh bawk.