ULFA hruaituin Assam-Meghalaya Border-ah inremna duh

Assam hel pawl United Liberation Front of Assam (ULFA) general sec­retary Anup Chetia chuan Lok Sabha inthlan hma ngeia Assam-Meghalaya ramri-a buaina, Langpih buaina chinfel a duh thu a sawi.

Anup Chetia hian North East Indigenous People’s Forum (NEIPF) aiawihin ramri buaina chungchang chingfel tur hian meeting a ko niin nimina report chuan a tarlang a, hetah hian state pahnih aṭanga kal khaw mite chuan dan leh thupek zawm turin thu an tiam nia tarlan a ni.

Meeting-ah hian Chetia hian inunauna rilru put a ṭhul thu sawiin, ramri buaina chu Assam leh Meghalaya sorkar chinfel tur a nih thu a sawi.

Forum aiawh hian Chetia bakah hian state pahnih aiawhte an tel a, anni bakah hian Hynniewtrep National Youth Front, Ri Bhoi Youth Front, Federation of Khasi Jaintia leh Garo People aiawhte an tel bawk a ni.

ULFA hruaitu chuan Langpih chu hmarchhaka hmun mawi berte zinga mi a nih thu sawiin, sorkar chuan helai hmunah hian tourism chawisang se a duh thu a sawi. Hetianga ti tur hian sorkar pawh an nawr tih sawiin, mipuiten hun nuam zawk an neih theih nan a rang thei ang berin hma la se a duh thu a sawi bawk.

Langpih-ah hian ramri chung changa buaina hi vawi eng emaw zat a chhuak tawh a, tunhnai lawk pawh khan buaina nasa tak a chhuak leh a ni.