India rama lei sei ber Assam leh Meghalaya inkarah dawh mai thei

Assam leh Arunachal Pra­desh inkara dawh, km 9.1-a sei Bhupen Hazarika Setu chu India rama lei sei ber ni mek a ni a, mahse Assam leh Meghalaya inkara dawh tuma hmalak mek Dhubri-Phulbari bridge chu Bhupen Hazarika Setu ai hian a sei dawn nia tarlan a ni.

Ministry of Road Transport and Highways hnuaia awm, Na­tio­nal Highways and Infra­structure Development Corpora­tion Limited (NHIDCL) chuan kum li kalta daih tawhah khan ruahmanna siamin, Dhubri-Phulbari bridge sei zawng tur hian km 19.8 chu a rawt a ni.

Dhubri leh Phulbari hi Bra­hma­pura kama awm ve ve niin Bangladesh-a a luanluh hma lawka awm an ni. Tunah hian lui ral lehlam ve vea awm ni si hi kawngpui aṭanga kal dawn chuan km 210 zeta thui a ni thung.

Dhubri leh Phulbari inkar kalna awlsam leh chak ber chu motorboat niin, darkar thum te thang a ngai tho niin NHIDCL general manager (technical) Man­mohan Deol chuan a sawi. Mahse fur lai chuan tui a len nasat ṭhin avangin motorboat pawh hi an hmang ṭha ngam ngai meuh lo a ni.

Lei dawhna atan hian cheng vaibelchhe 5000 ruahman phawt a ni a, Northeast Road Network Connectivity Project-a Phase 3 hnuaiah hna hi thawh a ni dawn a, Japan International Co-operation Agency chuan loan an puktir dawn thung.